കോവിഡുകാലം (ശകലം - 9/28/2022)

കോവിഡംബരമാർന്നു¹നിൽപ്പൊരുകാലാമാണിതു ഭൂമിയിൽ
കോവിഡംബിതരായി² മാനുഷരാശവിട്ടു വലഞ്ഞുപോയ്! 

വാക്‌സിനുണ്ടൊരു മൂന്നുനാലു, മരുന്നുകൂട്ടുകൾ വേറെയും
വാക്സമർത്ഥനുചൊല്ലുവാനൊരു മന്ത്രജാലവുമുണ്ടുപോൽ³!

മാസ്‌കുവച്ചു നടക്കണം, അടിയാറു⁴ ദൂരെയിരിക്കണം,
ഭാസ്കരൻ്റെവെളിച്ചമേറ്റഥ ദേഹശുദ്ധിവരുത്തണം.⁵

സൂമിലൂടെ⁶ നടത്തണം കല്യാണവും പുരകേറലും
നാമിതൊക്കെ സഹിക്കണം, ആയ⁷ പങ്കുവഹിക്കണം!

---

1 - കോവിഡ് + അംബരമാർന്നു

2 - കോവിഡംബിതർ = അപഹാസ്യരായവർ, എത്ര ശ്രമിച്ചിട്ടും അതിനെ കീഴ്‌പ്പെടുത്താൻ കഴിയാത്തതിനാൽ 

3 - മരുന്നുകൊണ്ടും മന്ത്രംകൊണ്ടും മാറുന്നില്ലെന്നു സാരം 

4 - ആറടി 

5 - സൂര്യപ്രകാശം ഏൽക്കുന്നത് കോവിഡ് മാറാൻ നന്നെന്നൊരു പഠനമുണ്ട് 

6 - zoom എന്ന app

7 - ആകുംവണ്ണം 

സമയം കളയാൻ വെറുതേ കോറിയത്. സാഹിത്യമൂല്യം കുറവാണ്, പക്ഷേ കുറച്ചു വാക്‌സാമർത്ഥ്യം കാട്ടിയിട്ടുണ്ട്! :-)